La falta d’alcuerdu nel candidatu frena la moción de censura contra Foro

L’alcaldía de Foro nun peligra. PSOE y Xixón Sí Puede nun lleguen a un alcuerdu sobre’l candidatu pa liderar la moción de censura contra Carmen Moriyón, polo que va terminar la so segunda llexislatura.

La propuesta d’Izquierda Xunida d’entamar una moción de censura al traviés de la xunión de la izquierda que nun s’algamó hai trés años nun va llegar a bon puertu. La intención de los socialistes de que’l so voceru José María Pérez lidere la mesma y la negativa de Xixón Sí Puede, que quier que la encabece’l so promotor, Aurelio Martín, nun da llugar a alcuerdu pa la mesma.

El propiu Martín, que se descartó como candidatu dende un primer momentu, ta acabante de dar por zarrada la posibilidá d’echar del gobiernu municipal a la derecha. Al respeuto señala a la candidatura de xunidá popular, qu’argumentaba una posible confluencia pa sumar 8 conceyales (6 más 2) sobre los 7 socialistes, dalgo que’l voceru d’IX refuga al entender que debería tener más pesu la llista más votada.