La empresa Reteyaores S.L. gana'l Pegollu de los Premios Andrés Solar 2016

La Xunta pola Defensa la Llingua Asturiana anuncia los ganadores de los Premios Andrés Solar na so XXXII edición. 

Entamaos añalmente pola Xunta pola Defensa de la Llingua Asturiana, estos premios, que recuerden la figura del escritor y miembru fundador de la Xunta Andrés Solar Santurio, pretenden premiar y castigar a les persones y/o instituciones qu'a lo llargo l'añu destaquen pola so llabor positiva o negativa pa cola llingua asturiana. Per un llau, la Xunta premia col 'Pegollu' a una entidá o persona que rescamplara pol so llabor en defensa o promoción del asturianu. Na parte negativa ta'l 'Madreñazu', que reconoz a la persona o entidá que rescamplara pol so llabor negativu pa cola llingua asturiana. 

 El Pegollu d’esti añu 2016 quier reconocer el llabor fundamental de la empresa Reteyaores S.L. empresa del sector de la construcción que vien llevando alantre’l so llabor con especial procuru nel tratamientu y usu del asturianu en tolos soportes comerciales y sociales que manexa.

 El “Madreñazu” a la Delegación del Gobiernu, na persona de Gabino de Lorenzo, poles sos acciones y midíes rancies, discriminatories y contra derechu que toma valiéndose d’instituciones, cargos y perres públiques. Por too esto, la Xunta pola Defensa de la Llingua Asturiana considéralos merecedores del antipremiu.

La entrega de los Premios va facese’l vienres día 16 d’avientu a les 19:30 hores nel Antiguu Institutu Xovellanos de Xixón. L’actu va contar cola actuación musical de L - R (Leticia González & Rubén Bada).

Tamién, como tolos años, depués del actu va haber una espicha. Esti añu va ser nel chigre xixonés La Xuanina (Cai Caveda, 7), y la entrada val 21 euros. Pa dir, hai qu’acutar sitiu, y pa eso pue llamase al 985229553 o mandar un corréu a info@exunta.org .