Esti vienres entréguense los Premios Andrés Solaru

Los gallardonaos pola XDLA son la empresa Reteyaores y Gabino de Lorenzo na so estaya positiva y negativa, de manera respeutiva.

Los primeros reciben el Pegollu de la Xunta pola Defensa de la Llingua Asturiana (XDLA), premiu que reconoz a una entidá o persona que rescamplara pol so trabayu en defensa o promoción del asturianu. La firma del sector de la construcción asentada en Sariegu algama esti reconocimientu por llevar "alantre’l so llabor con especial procuru nel tratamientu y usu del asturianu en tolos soportes comerciales y sociales que manexa”.

Mentes, l'antipremiu, el Madreñazu, ye pa la Delegación del Gobiernu estatal n’Asturies, en concreto pal so máximu responsable, Gabino de Lorenzo, “poles sos acciones y midíes rancies, discriminatories y contra derechu que toma valiéndose d’instituciones, cargos y perres públiques”. La gala d'entrega de dambos gallardones va celebrase mañana, a les 19.30 hores, nel xixonés Centru de Cultura Antiguu Institutu, con entrada llibre.

La ceremonia va contar coles intervenciones de la XDLA y de los premiaos y va zarrase cola actuación musical de L-R (Leticia González & Rubén Bada). Tres l'eventu, va tener llugar la tradicional espicha, que nesta ocasión tien como sede la sidrería La Xuanina.