La declaración d’impautu ambiental recomienda la estación en Moreda

L’esperáu documentu pa entamar l’espediente del Plan de Víes yá ta termináu y recomienda Moreda como meyor opción pa la estación. El Ministeriu pa la Transición Ecolóxica y el Retu Demográficu yá unvió la declaración d’impautu ambiental al BOE pa la so espublización, pasu necesariu pa la reactivación del proyeutu.

Los informes previos afiten un impautu menor en Moreda que na zona del Muséu del Ferrocarril, onde taba prevista la construcción nel conveniu robláu por toles alministraciones nel 2019, agora frenáu pol PSOE llocal. Apunten que van xenerase menos restos, sobre manera en movimientu de tierres, y va afeutar tamién menos a los acuíferos.

Ana González Rodríguez celebró la finalización de la declaración d’impautu ambiental polo que significa pa la concreición del proyeutu definitivu. L’alcaldesa nun descartara dafechu nel so momentu la otra opción pa la estación intermodal, pero les conclusiones del estudiu refuercen la so apuesta por Moreda.