Javier Fernández recibe al Mavi pol so títulu de campeón de Copa

El presidente del país, Javier Fernández, recibió na Xunta Xeneral a les xugadores y cuerpo téunicu del Mavi Nuevas Tecnologías La Calzada, campeón de Copa de balonmanu. "Tengo qu'insistir na mio norabona y, amás, y esto ye importante, davos les gracies", destacó.

"Algamasteis una importante meta deportiva, pero tamién disteis un troféu a La Calzada, a Xixón y a Asturies entera", siguió Fernández, qu'emponderó'l llabor del presidente Miguel Álvarez Baños, del entrenador Diego Lafuente y de les xugadores, con un recuerdu especial a "la vuesa capitana, Marizza Faría, que tres el trunfu tuvo que pasar pel duru momentu de la perda de la so madre la selmana pasada en Paraguai, y a la qu'acompañamos nel so dolor". D'igual forma auguró más ésitos pal Mavi y pal deporte femenín asturianu, nun momentu dulce polos ésitos tamién del Hostelcur Xixón de ḥoquei sobre patinos.

Les de La Calzada ganaron el pasáu 22 d'abril la Copa en Málaga tres derrotar na final al SUPER AMARA Bera Bera por 20-17. Enantes dexaren pel camín el Rocasa Gran Canaria (24-19) en cuartos y al Godoy Maceira Porriño (24-20), en semifinales.