¡Campeones!

Les xugadores de Diego Lafuente yá dieron el primer toque nos cuartos de final del vienres al superar al campeón de la edición pasada, el Rocasa Gran Canaria, por 24-19. En semifinales crucaríense col Godoy Maceira Porriño, conxuntu a priori asequible, y tampoco nun fallaron: 24-20.

Asina, el Mavi Nuevas Tecnologías La Calzada accedía a la gran final de la Copa, un fechu yá por si históricu. Pero nun resultaría bastante pal equipu que disputa los sos partíos nel pabellón de L'Arena.

Con un nivel altísimu de xuegu, al igual qu'en tol tornéu, y con una Renata Lais impresionante na portería, les xixoneses dexaron nidio a les donostiarres de que viaxaren a Málaga pa facer dalgo grande. Tres llegar con un axustáu 8-7 al descansu, el Mavi pisó l'acelerador pa sacar una ventaya de 6 goles a falta de nueve minutos (18-12), renta que supo manexar pese al esfuerciu del Bera Bera.

Al final, 20-17 nel marcador y primer títulu absolutu pal balonmanu femenín asturianu, que da'l pase al club de La Calzada a competiciones europees, oxetivu pol que lluchaba esta temporada. Asina, Xixón va acoyer partíos de la Challenge Cup el cursu que vien.

Recibimientu na Casa Conceyu

Al igual qu'asocediera recién col Hostelcur Xixón, ganador de la Copa d'Europa de ḥoquei patinos femenín, el Mavi va ser recibíu esta selmana na Casa Conceyu. Les campeones aportaron a Xixón esta madrugada depués d'un llargu viaxe n'autocar dende Málaga.