Iniciativa pol Asturianu demanda a los partíos qu’amuesen el so sofitu al SNL coincidiendo col so decimoquintu aniversariu

“Ye’l meyor homenaxe que los partíos pueden facer pa celebrar estos 15 años d’oficina”, destaca Inaciu Galán, presidente d’Iniciativa pol Asturianu. Propone que se presente una moción de sofitu a la Oficina de Normalización Llingüística pa la so aprobación en Plenu.

Tamién “de los sos trabayadores y de tol llabor na normalización del asturianu nel conceyu”. Asina, la organización pretende consiguir “un sofitu públicu del restu de partíos frente a los ataques inxustificaos, radicales y fuera de llugar del PP a esti organismu”.

Selmanes atrás, Pablo González Menéndez, voceru municipal del PP, llegó a afirmar que l’asturianu nun tenía demanda social nel conceyu y que los que quixeren ‘imponer’ l’idioma llariegu diben facelo “perriba del nuesu cadabre”. Unes declaraciones que se sumen a la campaña d’odiu hacia la llingua asturiana entamada polos populares a nivel nacional y estatal.

Galán recuerda que nel 2008 “la mayoría del Plenu del Conceyu de Xixón aprobó la Ordenanza Municipal del Usu del Asturianu. En marzu de 2016, PSOE, Foro, Xixón Sí Puede, Izquierda Xunida y Ciudadanos daben el sí al Plan de Normalización del asturianu vixente, quedando el PP solu n’astención. Ésta ye una prueba más nel avance del consesu social qu’arrodia al asturianu y verdaderamente ye una pena qu’el PP quede na marxinalidá nesti asuntu”.

Por último, valora “el constante llabor de la Oficina que dempués de tantos años cuenta con un espaciu dignu. Actividades como ‘Saca la llingua’, pallabreros, talleres y la rellación colos comerciantes y hosteleros pa fomentar l’usu del idioma faen qu’esti ente seya esencial pa que l’asturianu siga teniendo una presencia cada día mayor na sociedá xixonesa”.