Entregáronse les distinciones de la villa

La Medaya d'Oru merecióla'l proyeutu social ‘Una Ciudad para todos’. Estos reconocimientos, que se dan pa San Pedro, tuvieron que s'aplazar nel so momentu.

Nun pudo ser nel Teatru Xovellanos, como taba previsto nun primer momentu, pero la emoción nun faltó nel actu d'entrega de les medayes y distinciones del Ayuntamientu de Xixón. El salón de receiciones de la Casa Conceyu foi'l llugar onde finalmente se desendolcó con toles midíes de seguranza pola pandemia de COVID-19.

La presidenta Arancha Martínez Cueto representó a 'Una Ciudad para todos', asociación que recibió esti 2020 la Medaya d'Oru. Les de Plata foron pal periodista José Antonio Rodríguez Canal; el balonmanista Raúl Entrerríos, que recoyó'l so padre José Manuel; y l'Asociación ADANSI, nesti casu la so presidenta Carmen de la Rosa.

D'igual forma, el Conceyu concedió al escritor chilenu Luis Sepúlveda el reconocimientu de Fíu Adoptivu de Xixón y al abogáu Francisco Prendes Quirós el de Fíu Predilectu, dambos a títulu póstumu. Tuvieron presentes nel actu les sos vilbes Carmen Yáñez y Carmen Veiga, de manera respeutiva.