El Telecable viaxa a Catalunya a pola primer Supercopa de la historia

Lligues, copes y copes d’Europa rellumen en La Calzada. Son los títulos que posee’l Telecable Solimar Xixón, que busca sumar a los sos 12 trofeos el de creación nueva, la Supercopa, col que s’abre en Catalunya la temporada oficial de ḥoquei sobre patinos femenín.

El Generali HC Palau de Plegamans va ser mañana, a les 13 hores (Esport3 y OK Liga TV), el rival en semifinales a superar pa tar na final del domingu a les 19.30 hores. El sortéu de la competición qu’axunta a los cuatro meyores equipos de la temporada pasada quixo cruciar al Telecable col actual campeón de Lliga, enfrentándose na otra eliminatoria’l Martinelia CP Manlleu y l’anfitrión Cerdanyola CH Feníe Energía.

Pa esta temporada’l Telecable presenta dos novedaes tres la salida de María Sanjurjo, que torna al Liceo, y de la francesa Vanessa Daribo, que tamién volvió al so país pa incorporase al CS Noisy-le-Grand RS. Los refuercios pal téunicu Fernando Sierra son la portera chilena Fernanda Hidalgo (Manlleu) y l’arxentina Mili Carrera (Concepción de San Juan).