El Telecable defende n'A Coruña'l títulu de Copa

Busca la revancha col Magic Studio Manlleu, que lu eliminó nes semifinales de la OK Lliga.

El Telecable Gijón Solimar defende na fase final d'A Coruña'l títulu de Copa ganáu nel 2019. La ciudá gallega, como asocedió en Reus, acueye tanto la competición femenina como la masculina llueu d'un añu de parón pola pandemia de COVID-19.

Les de La Calzada, que namái opten esta temporada a esti títulu depués de cayer en semifinales na OK Lliga de ḥoquei sobre patinos y na Copa d'Europa, van tratar de vengar na cancha la derrota lliguera col Manlleu por 7-2 y 2-4 (4-11 nel global). Les catalanes, que na final nun pudieron col Generali HC Palau de Plegamans (3-7 y 3-1, pa un 4-8), tamién campeón d'Europa llueu d'eliminar al Telecable (4-3), busquen pela so parte en Galicia acabar la so bona temporada con un títulu que yá llevantaron nel 2015 en Lloret de Mar.

Fernando Sierra tien a tola plantía disponible pal partíu que se xuega en Riazor esta tarde a les 18 hores y que se va poder siguir en direuto per Teledeporte, cola dulda única de Nuria Obeso, mancada nel entrenamientu del llunes. Nel casu de ganar, el Telecable veríase les cares el sábadu a les 11 hores col Voltregà Stern-Motor, que superó pela mañana al San Cugat (3-1).

Na imaxe, les xugadores del Telecable nos cuartos de final de Copa d'Europa frente al portugués Clube Atlético de Campo de Ourique, al que superaron por 7-2. Semeya propiedá del Telecable Gijón Solimar.