El Sporting va viaxar otra vuelta a Salamanca pa la segunda ronda de Copa

Unionistas va ser el rival de los de Ramírez na ponte festiva de la Constitución nel Reina Sofía, con un aforu pa cuasi 5.000 espectadores.

Va ser un viaxe idénticu al que fixo pa Tolos Santos el Sporting, pero con 50 quilómetros menos. Ye la distancia esistente ente Guijuelo y Salamanca, onde la suerte quixo que tornara l'equipu roxiblancu en Copa, agora a la capital.

Si nel Luis Ramos axuntaron na grada supletoria instalada nun fondu 400 sportinguistes pa presenciar la victoria por 0-3, ye posible que la cantidá se supere na visita a Unionistas, club fundáu por aficionaos como homenaxe a la Unión Deportiva Salamanca llueu de la so desapaición va xusto agora 10 años, y meyor exemplu del esitosu modelu de fútbol popular que sigue en Xixón tamién l'UC Ceares. Ocupa nestos momentos el puestu 14 del grupu 1 de Primera RFEF con 14 puntos, 4 perriba de los puestos de peligru, y a 8 de los de promoción, baxo les órdenes de Dani Ponz.

El Reina Sofía cuenta con un mayor aforu que'l campu de Guijuelo y la disponibilidá d'entraes pal partíu, que va tener llugar el 5, 6 o 7 d'avientu, podría ser superior. Al contar con más de 4.000 socios, dependerá de la demanda llocal, anque podríen llegar a Xixón dalgo más de 500 entraes.

Na semeya, Etxeita amuesa la papeleta del Sporting nel sortéu celebráu esta mañana na Ciudad Deportiva de Las Rozas.