El Sporting va contar cola dificultá del prau artificial na primer ronda de Copa

El Guijuelo, equipu de Segunda RFEF, ye’l rival del Sporting na primer ronda de la Copa. Los de Miguel Ángel Ramírez ganen un desplazamientu cómodu pero van tener la dificultá de xugar el choque, a partíu únicu la selmana del 1 de payares, nun prau artificial.

El xugador de Fernando Pumares, del Racing Club de Ferrol, sacó la bola del Sporting nel sortéu celebráu esta mañana en la Ciudad Deportiva de Las Rozas depués de qu’Álvaro Clausí, capitán del Cacereño, amosara la del Guijuelo. Yá salieren entantes tolos posibles rivales de Tercera RFEF, polo que los roxiblancos yá sabíen que-yos tocaba un equipu de Segunda RFEF, al igual que l’añu pasáu, cuando tuvo que desplazase a Beasain.

L’equipu del sur de Salamanca ye un vieyu conocíu de los conxuntos asturianos y del filial del Sporting. El Guijuelo lleva cuasi venti años de manera siguida en Segunda División B y esta temporada coincide nel mesmu grupu que los equipos d’Asturies de la so categoría, el 1.

Ocupa’l sestu puestu con 11 puntos depués d’empatar col Avilés Industrial nel Suárez Puerta (2-2) el domingu, a 7 del líder Zamora y a 1 del Racing Villalbés, qu’ocupa la última plaza que da accesu a les eliminatories pol ascensu. Xuega los sos partíos como llocal nel campu Luis Ramos, de prau artificial, con un aforu cercanu a los 2.000 espectadores, polo que va ser difícil un gran desplazamientu de l’afición del Sporting magar ser un viaxe cómodu y poder coincidir cola festividá de Tolos Santos.

Na imaxe, la papeleta del Sporting.