El sortéu empareya al Sporting col Amorebieta

El partíu correspondiente a la segunda ronda de la Copa va celebrase na selmana del 6 de xineru n'Urritxe, campu de prau natural.

El Sporting va enfrentase a un equipu de Segunda División B tres dexar fuera a un Tercera, el Quintanar del Rey, al que derrotaron el miércoles por 1-2 tres remontar con goles de Cumic y Borja López, ésti nel minutu 89, el tantu inicial de Ricar al entamu de la segunda parte. Los de David Gallego van tener enfrente al Amorebieta equipu que lidera el subgrupu 2A con 16 puntos, dos más que l'Alavés B, que cuenta con un partíu menos.

Los d'Amorebieta-Etxano xueguen n'Urritxe, campu municipal de prau natural con aforu pa 3.000 espectadores, y vienen de dexar fuera a la UD Logroñés gracies a un gol de Mikel Álvaro. El partíu col equipu de La Rioja celebróse ensin públicu por cuenta les restricciones impuestes pol Gobiernu vascu pa controlar l'espardimientu del coronavirus SARS-CoV-2 y ye posible que contra'l Sporting se repita la situación.

El xugador más conocíu de la so plantía ye'l veteranu porteru Saizar, de 37 años, con pasáu en Primera col Córdoba. Dirixe l'equipu azul per tercer temporada l'ex delanteru Iñigo Vélez.

Na semeya, Mani, capitán del Marchamalo, muestra la papeleta del Sporting nel sortéu celebráu en Las Rozas.