La falta de puntería complicó’l duelu coperu col Quintanar al Sporting

El Sporting clasificó per primer vegada nel formatu actual a la segunda ronda de la Copa tres remontar n’Albacete’l so duelu col Quintanar del Rey (1-2), equipu manchegu de Tercera División. Un gol de Borja López nel minutu 89 evitó la prórroga pa los de David Gallego nun partíu marcáu pola falta d’aciertu de los roxiblancos.

Pudo goliar el Sporting de tener más puntería énte un voluntariosu Quintanar, sobre manera Cumic, qu’esperdició hasta cinco ocasiones mui clares. El serbiu, sicasí, foi l’autor del empate na xugada de menos peligru: un centru que nun atopó rematador entró na portería llocal cola complicidá de la defensa y el porteru.

Enantes, Ricard dexara, al minutu de principiar, el gol de tola primer ronda al anotar dende’l so propiu campu, con Cristian Joel adelantáu y xenerosu na so intervención. La igualada de Cumic, nel 63, dio tranquilidá a un Sporting, que nun atoparía’l tantu de la victoria hasta’l 89 tres una falta ensayada que sacó Carmona p’Aitor García, que cedió a Borja López pa marcar depués de que Ferri rechazara’l primer disparu.

Evitábase asina una prórroga qu’agotaría un poco más les piernes d’una plantiya curtia d’efeutivos y afeutáu poles lesiones y la obligatoriedá de contar siempre con un mínimu de 7 fiches del primer equipu. Esta situación llevó a Gallego a contar con trés titulares el domingu, Borja López, Javi Fuego y Pedro, pal once titular xunto con otros non habituales como Cumic, Carmona, Álvaro Vázquez o Pablo Pérez, que nun aprovecharon la so oportunidá énte un Quintanar mui voluntariosu que tuvo mui cerca de dar la sorpresa.

La victoria permite al Sporting avanzar de ronda, con fecha prevista pa la selmana del 6 de xineru, onde esperará un Segunda División B o otru Segunda. El sortéu va celebrase mañana a les 13 hores nel salón Luis Aragonés de la Ciudad del Fútbol de Las Rozas.

Na semeya, Borja López, autor del gol decisivu.