El públicu tornó a El Molinón na derrota del Sporting en Copa col Betis

L'equipu roxiblancu, con 10 dende'l minutu 21, encaxó los dos goles del partíu na primer media hora baxo la mirada de 300 siguidores.

L'árbitru De Burgos Bengoetxea foi protagonista nel partíu de deiciseisavos de Copa col Betis (0-2), primer partíu con públicu n'El Molinón en 10 meses. Énte l'ausencia del VAR nesta ronda, el vascu interpretó como penalti un cayida de Lainez con Javi Fuego y non una manu de Víctor Ruiz a tiru de Cumic.

Entemedies, espulsó con collorada direuta a Marc Valiente nuna entrada fuera de llugar del central en zona non peligrosa, a lo poco de la xugada nel área visitante. Siete minutos depués llegaría'l penalti sí señaláu que marcaría pal Betis Canales.

El canteranu Rodri, nuna gran xugada nel 31, golpiaba darréu a los de Gallego con un segundu gol que paecía sentenciar la eliminatoria. Con 10, sicasí, el Sporting nun dexó de dar la cara y inlcusive tuvo opciones d'empatar na segunda parte, pero Cumic nun supo definir nun ún contra ún con Joel y Pablo Pérez escoyó mal nuna rápida xugada pela derecha.

D'esta forma'l Sporting diz adiós a la Copa 2020-2021 tres dexar fuera al Quintanar del Rey y al Amorebieta. La bona noticia foi la recuperación de la mayor parte de los xugadores que se contaxaron de COVID-19, con titularidá pa Pablo García y minutos pa Pablo Pérez, Nacho Méndez y Manu García, polo que va contar colos 9 afeutaos pa preparar la visita al Castellón (18.15 hores, Castalia), conxuntu que precisamente anunció güei dos positivos na so plantía.