Nueve positivos por COVID-19 compliquen xineru al Sporting

Gallego va contar con mui pocos efeutivos p'afrontar dos partíos de Lliga y el de Copa.

La vuelta al trabayu depués del parón por Navidá nun traxo bones noticies pal Sporting. Nueve xugadores, de los que trés son del filial con dinámica del primer equipu, dieron positivu por COVID-19 y compliquen el futuru próximu a un equipu que se xuega muncho esta temporada.

Los PCR fechos el llunes confirmaron la cifra esauta depués de que saltara la noticia de más de seis casos posibles ente fubtolistes. Al final xubi a 10 al contabilizar tamién a un miembru del equipu que trabaya con ellos, ensin confirmar el club nin cargu nin nome de nengún de los contaxaos.

Sicasí, hai constancia de qu'ente los afeutaos pola COVID-19 hai dellos titulares, lo que complica a Gallego a la hora de formar un equipu yá mui xustu d'efeutivos. El protocolu manda una cuarentena de diez díes y dos PCR negatives pa poder volver a la dinámica d'equipu, polo qu'habría casos que se podría allargar hasta les trés selmanes.

A curtiu plazu, el Sporting tien el partíu de Lugo nel Anxo Carro del llunes, que namái s'aplazaría si apaecieren más positivos nes pruebes previes a la cita que dexaren en menos de 13 los futbolistes disponibles, mentes que'l xueves va tener que desplazase a Euskadi pa xugar segunda ronda de Copa contra l'Amorebieta. Trés díes depués, los roxiblancos van recibir al Fuenlabrada, tando la siguiente fin de selmana reservada pa la siguiente eliminatoria del tornéu coperu tres la incoporación de los cuatro conxuntos que xueguen la Supercopa.