El Palaciu Revillaxixéu va acoyer una gran esposición nel 2024 con fondos municipales

El Conceyu y la Fundación CaxAstur algamaron un alcuerdu pa la cesión per un añu de baldre del Palaciu Revillaxixéu. Esti edificiu emblemáticu de la ciudá va acoyer dende Selmana Santa un gran esposición na que los ciudadanos van poder contemplar fondos de les coleiciones municipales agora nun espuestos por falta d’espaciu.

“Retomamos rellaciones institucionales con Fundación CaxAstur”, rescampló Carmen Moriyón nun actu nel Muséu Casa Natal Xovellanos. D’estos contautos salió la cesión nel 2024 del Palaciu Revillaxixéu, un “edificiu que deben de disfrutalu los xixoneses y los visitantes”.

L’oxetivu ye entamar una gran esposición dende Selmana Santa a lo último del branu de la que se va encargar Lucía Peláez, direutora del muséu onde se dio l’anuncia. Una muestra “pa que puedan salir a la lluz parte d’eses ayalgues” que nun tán espuestes anguaño por falta d’espaciu nos muesos de belles artes xixoneses.

Cambiu nel Plan d’Usu de Tabacalarea

Moriyón tamién comunicó que la selmana próxima la xunta de gobiernu va aprobar “una matización mui simple al Plan d’Usos” de Tabacalera que va afeutar a la planta primer y segunda. “Tornamos a los oríxenes del proyeutu internacional del 2009; trátase de poner a disposición ente les dos plantes más de 3.000 metros cuadraos espositivos”, apuntó l’alcaldesa.

Según añadió, esta modificación “va permitir tener accesu a proyeutos culturales y artíscos que güei Xixón nun pue asumir por nun tener esi espaciu”.

Na semeya, Moriyón, nel centru, acompañau por Jorge González-Palacios, conceyal de Rellaciones Institucionales, y Ana Montserrat López Moro, de Cultura.