El Motive.co afronta nel Palaciu'l so duelu européu más duru

|
Házená Kynžvart 24-26 Motive.co La Calzada (8 de xineru del 2023)

Les de La Calzada tornaron de la República Checa con una ventaya de dos goles (24-26).

L'Házená Kynžvart confirmóse como'l rival más complicáu qu'atopó na EHF European Cup, dalgo lóxico al avanzar rondes na competición. Si col vénetu Alì-Best Espresso Mestrino (21-40; 37-74 nel global) y l'austriacu WAT Atzgersdorf (18-33; 40-67) sentenciaron la eliminatoria nel partíu d'ida, l'equipu de Cristina Cabeza nun pue confiase nel choque de mañana nel Palaciu de Deportes.

Pa pasar a cuartos de final ha defender la ventaya de 2 goles algamada en Cheb, población cercana a Lázně Kynžvart, na parte occidental del país, cuasi na llende con Alemaña. Nun entamó bien el Motive.co, qu'a los 15 minutos perdía 8-2, pero consiguiría reaicionar pa llegar al descansu con un 12-10 nel marcador depués de facer un parcial de 0-6 en 6 minutos.

La segunda metá yá foi de dominiu xixonés, hasta ponese con 21-25, pero unes discutíes decisiones arbitrales finales fixo que se tuviera que conformar col 24-26. Pal partíu de mañana, programáu a les 20 hores nel Palaciu, onde s'espera un bon ambiente, Cabeza tien la dulda de Paula Valdivia por unes molesties.

Na imaxe, el Motive.co defende un ataque checu. Semeya propiedá del Club Balonmano La Calzada.

 

 

Contador Estadistiques