El Liberbank clasifica pa semifinales de Copa, onde espera'l Rincón Málaga

|
Liberbank Xixón 26-20 KH-7 Granollers (3 de setiembre 2020) cuartos Copa

El club de La Calzada foi mui superior al KH-7 Granollers (26-20) y tien la vía abierta hacia'l títulu tres cayer eliminaes les favorites.

Depués d'una primer parte igualada (12-12), el Liberbank Xixón punxo la direuta y consiguió marchar nel marcador énte un conxuntu catalán que se vio superáu totalmente. Una ventaya de 4 goles (18-14) dio tranquilidá a les asturianes, que llegaron a ponese 6 arriba (22-16), renta que supieron alministrar hasta'l final.

Mañana, a les 19.15 hores, tamién coles cámáres de Teledeporte como testigues, les moces de Cristina Cabeza van enfrentase nes semifinales de la Copa al equipu que cuenta col apoyu del públicu llocal d'Alhaurín de la Torre, les 200 persones que pueden entrar nel polideportivu El Limón poles midíes de prevención pola COVID-19, el Rincón Fertilidad Málaga. Les andaluces superaron a ún de les favorites, el Rocasa Gran Canaria, por 23-18.

Nun foi l'únicu campanazu de la competición, yá que'l campeón actual, el Super Amara Bera Bera, quedó elimináu pol Elche Visitelche.com (24-28), y l'Aula Alimentos Valladolid superó al Atlético Guardés por 33-31. El partíu ente ilicitanes y castellanes va tener llugar depués que'l del Liberbank, a les 21.15 hores, cola final prevista'l domingu a les 17.45 hores.

Contador Estadistiques