El III Premiu de Novela Curtia Andrés Solar Santurio abre’l plazu d’unvíu de trabayos

La Conceyalía de Cultura convoca una edición nueva del Premiu de Novela Curtia Andrés Solar Santurio, la tercera. Los ciudadanos que quieran participar tienen hasta’l 26 de setiembre, Día Européu de les Llingües, pa unviar les sos creaciones per vía electrónica o postal.

Col enfotu de “favorecer y promover la creación lliteraria n’asturianu y al tiempu facer alcordanza de la figura del escritor xixonés Andrés Solar Santurio y la so querencia pola llingua de nueso y la so normalización social” entámase esti concursu, que nos sos primeres ediciones llevaron dos nomes destacaos de les nueses lletres. Primero foi Milio Rodríguez Cueto con ‘Fortuna’, y llueu Gonzalo González Barreñada por ‘La guerra del Medrosu’.

El premiu tien una recompensa de 3.000 euros, amás de la espublización de la obra. Pueden participar nél autores que presenten trabayos inéditos en llingua asturiana, siguiendo les normes de l’Academia de la Llingua Asturiana, con una estensión mínima de 75 páxines y una máxima de 130.

El plazu de presentaciones de creaciones, per vía electrónica o postal, fina’l 26 de setiembre y el fallu va dase a conocer n’otra fecha simbólica, el 27 d’avientu, cabudañu de la muerte prematura del Deva nun accidente de tráficu.