Aconceyó'l xuráu del III Premiu de Novela Curtia Andrés Solar Santurio

El fallu del concursu va dase a conocer el 27 d'avientu, cabudañu del poeta de Deva.

Esti martes aconceyó'l xuráu encargáu de fallar el III Premiu de Novela Curtia Andrés Solar Santurio. La conceyala de Cultura, Mocedá y Museos, Ana Montserrat López Moro, presidió'l mesmu, compuestu por María Xosé Rodríguez López, responsable de la Oficina de Normalización Llingüística, que tamién fixo'l llabor de secretaria; Xandru Martino, filólogu, escritor y académicu de la llingua asturiana; Luis Casteleiro, filólogu de la Direición Xeneral d’Aición Cultural y Normalización Llingüística y escritor; y Montserrat Machicado Compañy, filóloga especialista en llingua asturiana y responsable de la Estaya de la Llingua d'Avilés.

Na xunta decidióse la obra merecedora del gallardón ente toles presentaes pero, como ye vezu, nun se va facer públicu'l nome del autor hasta'l 27 d'avientu. Esi día ye'l cabudañu de la muerte prematura d'Andrés el de Deva nun accidente de tráficu y faise un actu de recuerdu nel Centru de Cultura Antiguu Institutu al qu'acude la familia Solar, qu'entrega'l premiu al ganador.

Na semeya, Casteleiro, Martino, Machicado, Rodríguez López y López Moro.