Cuatro talleres n’asturianu animen estes vacaciones a la reciella

La Oficina de Normalización Llingüística de Xixón entama pa xunetu y agostu cuatro talleres dientro de la programación cultural braniega. Baille, vistimienta tradicional, cómics y mitoloxía son les actividaes que pueden desenvolver les neñes y neños de Xixón estes vacaciones col asturianu como llingua vehicular.

El tendayu del Muséu del Pueblu d’Asturies acueye estos díes la primer actividá, ‘Baille embruxáu’, qu’axunta danza y cuentos p’averar al folclor asturianu a guaḥes de 4 a 6 años. Al traviés d’una historia, amás de deprender bailles y cantares, los participantes tán conociendo vocabulariu venceyáu cola cultura tradicional asturiana.

Del llunes al vienres viniente va tener llugar ‘Vistiéndonos como antaño’, actividá destinada pa neñes y neños de 6 a 12 años. Con esta actividá práutica van poder esperimentar coles materies primes y conocer les pieces de la indumentaria tradicional asturiana al tiempu que visten el so recortable propiu.

Ruma Barbero va poner un mini-taller de cómic del 20 al 31 entituláu ‘Dibuxando les maraviyes de Xixón’, tamién pa rapacines y rapacinos de 6 a 12 años. Ésti va centrase na so obra “Les 7 maraviyes de Xixón”, na qu’amuesa, al traviés de personaxes de la mitoloxía asturiana, los siete recursos turísticos más destacaos de Xixón, como l’acuariu, les playes, el parque Isabel la Católica, la Llaboral, el Xardín Botánicu y Cimavilla.

Por último, del 10 al 14 d’agostu, va desendolcase ‘Ponte la mázcara’, pa neñes y neños d’ente 5 y 8 años. Esta actividá va tratar sobre la mitoloxía asturiana, ellaborando los participantes con manualidaes una mázcara del so personaxe favoritu.

Un preciu de 2 euros

A esceición del de baille, el Centru de Cultura Antiguu Institutu va ser la sede de tolos talleres. El so preciu ye de 2 euros y el llargor de dos hores, de 11 a 13 hores.

Nel folletu d’actividaes del branu xixonés pue consultase los díes concretos pa cada franxa d’edá, númberu de places por sesión y mou d’inscripción.