L'Autoridá Portuaria autoriza la venta de los terrenos de Naval Xixón

El proyeutu pa rexenerar la zona oeste cumple'l so primer trámite, pendiente agora de llegar a un alcuerdu con Pymar pa la venta de la so parte.

El Conseyu d'Alministración de l'Autoridá Portuaria de Xixón aprobó la venta al Conceyu de los terrenos que tien en propiedá de Naval Xixón, 35.000 metros cuadraos que son un 65 por cientu del total. Éstos tasáronse en 4,6 millones d'euros, cantidá admitida pol equipu de gobiernu, que va llevar al Plenu d'abril una modificación presupuestaria "que dará'l soporte económicu necesariu a la operación", confirmó l'alcaldesa Carmen Moriyón a la salida del aconceyamientu del órganu, de la que ye vicepresidenta.

La operación zarraríase énte notariu en setiembre. Amás d'esta venta, el Puertu de Xixón cede otros 4.000 metros cuadraos pa la creación d'un paséu al llau de la mar que coneute la sablera col barriu d'El Natahoyo.

La intención municipal ye rexenerar la zona oeste de la villa con una operación nos vieyos terrenos de Naval Xixón pa recuperalu pa los xixoneses con un espaciu pa empreses d'economía azul, la venceyada cola mar; l'ampliación del Acuariu; y otros servicios. Pa completar esti ambiciosu proyeutu ye necesario tamién llegar a un alcuerdu con Pymar, propietariu del 35 por cientu restante de los terrenos, sociedá pública cola que siguen les negociaciones.

Na semeya, Moriyón señala la parte de los terrenos de propiedá de l'Autoridá Portuaria nuna intervención pa comunicar el preste del Conseyu d'Alministración pa la so venta al Conceyu.