La posibilidá de repetir un ATP 250 en Xixón cai per segunda ocasión y l’esfuerciu torna a centrase nun WTA 500

El tenis de más altu nivel ye probable que torne a Xixón, pero non esti añu. El movimientu p’acoyer l’ATP 250 que-y llevó Tel Aviv, suspendíu pola situación bélica na zona, por una meyor ufierta económica quedó pa prau pol mesmu motivu, nesta ocasión pola fecha por Sofía, pero sigue trabayándose pa ser sede d’un WTA 500, el circuitu femenín.

Había munches esperances puestes dende les federaciones asturiana y española de consiguir organizar en Xixón otru campeonatu masculín 250, la cuarta categoría en nivel y repartu de premios y puntos ATP depués de los cuatro ‘Grand Slam’, los Masters 1000 y l’ATP 500, na que nun ye raro contar con participación de dalgún ‘top 10’, como foi’l casu de Rublev l’añu pasáu, pero finalmente otru competidor con más puxu económicu quitó a los xixoneses la posibilidá de disfrutar nel Palaciu de Deportes d’un tornéu d’estes carauterístiques. Una capital como Sofía, que precisamente esti añu perdiera l’ATP 250 que venía entamando dende’l 2016, punxo una ufierta superior en 300.000 euros a l’asturiana.

D’esta forma va dir a Bulgaria la prueba pola que puyó Xixón previamente y que llevó la capital israelina pa organizala esti añu del 5 al 11 de payares. Ésta cubre’l güecu dexáu pola Kremlin Cup en Moscú, suspendida dende l’añu pasáu pola invasión de Rusia a Ucraína.

Los esfuercios tornen agora a centrase en garrar una llicencia de WTA, circuitu femenín, de más nivel, un 500. Dende les federaciones son optimistes con que pueda ser realidá l’añu que vien, col Palaciu otra vuelta como sede.

Na semeya, un momento de la final ente Sebastian Korda y Rublev.