El X Día de la Reciella ufre una xornada d'actividaes n'asturianu pa neñes y neños

El Muséu del Pueblu d'Asturies acueye una edición nueva d'esta iniciativa, que recupera la carrera familiar Entaína cuatro años depués.

El Salón de Receiciones del Conceyu de Xixón acoyó'l miércoles un añu más l’actu de presentación del programa completu del Día de la Reciella, que va celebrar la so décima edición mañana. Ana Montserrat López Moro, conceyala de Cultura, Mocedá y Museos, intervieno en primer llugar pa esplicar les aportaciones municipales a esta xornada, como l’actividá d’averamientu al axedrez, prevista pa les 12.15 hores, nel que collabora tamién el Club Antonio Rico.

“Animamos a les families a utilizar l’asturianu, en toles situaciones y en tolos momentos, porque ellos son el futuru del asturianu” y que “el Día de la Reciella seya tolos díes del añu”, apuntó la edil de Foro, porque “una llingua val pa comunicanos con otres persones y pa reconocenos como parte de la comunidá”. Tamién recordó toles collaboraciones anteriores del Conceyu con Reciella “coincidiendo col Día Internacional del Idioma Materno, cola ellaboración d’un material nel que s’informa de les ventayes del billingüismu n’Asturies; y tamién col programa que dende la Oficina de Normalización Llingüística se desenvuelve nes escueles de Xixón col envís de provocar cambios nos hábitos llingüísticos de los más pequeños, promover l’usu del asturianu na etapa non obligatoria de la Educación y concienciar al profesoráu y les families de la importancia d’utilizar l’asturianu nos primeros años de vida”.

Pa finar refirióse a la carrera Entaína, que se recupera nesta edición depués de trés años d’ausencia pola pandemia de COVID-19. “Presta pola vida, y nunca meyor dicho, ver a los neños y a les neñes, a la xente mozo y a la xente vieyo, participando nesa Entaína, la cuarta carrera familiar pol asturianu, na que se va pasando’l testigu de la fala ente les distintes xeneraciones”, espresó.

La inscripción y recoyida de dorsales va arrancar a les 11 hores na bolera, con salida a les 11.30 hores y final nesi mesmu puntu. “Ye una carrera con llinia de meta y demás, tenemos l’apoyu de la Conceyalía de Deportes que nos pon l’arcu de meta, pero ye una carrera informal”, esplicó David Guardado, de 'Reciella. Families pol Asturianu', qu’apuntó que “una de les persones que va correla esti añu tien 80 y pico años”.

Ye la güela Barbón, “que ta mui en forma”, mayor de la famiñia “qu’homenaxamos esti añu como símbolu de la tremisión xeneracional: va venir una güela, un fíu y les nietes, Emma y Vera, que son neñes socies. Pasen simbólicamente un testigu que ye’l testigu de la tresmisión xeneracional”, al igual que se venía faciendo n’ediciones anteriores. Sobre una posible rellación col presidente, bromió con que “en Llaviana hai munchos ‘Barbones’ y éstos son otra caña de los ‘Barbones’; tán emparentaos pero nun ye parentescu conocíu polo menos”.

Conciencia de la importancia de la tresmisión xeneracional del asturianu

“Una cosa mui prestosa pa nosotros ye qu’esti Día de la Reciella, como otres actividaes de Reciella, tienen l’apoyu casi unánime de la corporación. Incluso va unos años, nel añu 2018, aprobóse una declaración institucional del Ayuntamientu de Xixón d’apoyu al Día de la Reciella. Eso ye una cosa qu’indica que la llingua ye de toos y toes, y nosotros nesti casu lo que trabayamos ye esa tresmisión xeneracional del asturianu, que ye la llingua d’Asturies, ente les xeneraciones más moces”, destacó Guardado na so intervención, que recordó que “ye’l décimu añu de la Reciella, anque en realidá llevamos once años, pero hubo un añu que pol tema de la pandemia nun lu pudimos facer”.

Como principal novedá pa esta edición, que tien el lema 'La familia del asturianu crez', señaló que “intentamos dar más protagonismu a los neños y a les neñes porque cuando entamamos col Día de la Reciella la mayoría de les families teníamos neños y neñes de meses, de 1 añu o de 2 años… Y agora’l que tenía 1 añu tien 12, ta nel institutu, y hai coses que van cambiando nos sos gustos y tenemos que dir modificando, ensin escaecer tampoco que vien xente nuevu, que sigue habiendo afortunadamente neños y neñes pequeñes”.

Asina “lo que facemos ye da-yos un poco más de protagonismu a los propios neños y neñes de les families de Reciella”, como ye la participación nel ‘Mundialín interReciella de Fútbol’ (12.15 hores) con equipos propios –los partíos van llocutalos en direuto Miguel Fernandi y Pelayo Rodríguez, de RPA–, nel desfile de moda caseru con taller previu puestu por Ringo Rango (13.15 hores) y nel de cosplay (16 hores) con Shiro Ychigo (Blanca Fernández) como maestra de ceremonies o’l conciertu final (18 hores), qu’esti añu va contar con intervenciones d’un gaiteru, un acordionista o una panderetera del coleutivu, toos coordinados por David Varela.

Completa’l programa del Día de la Reciella una sesión vermú con DJ Sandrasian d’Abres (14.15 hores), “que ta mui bien, una fusión de música asturiana con urbana”; un taller d’origami con Inari Guaken, otra de les novedaes, y otru d’audiovisual con Alma Hidalgo (entrambos a les 17 hores); y la danza prima final (19 hores). Va haber tamién un espaciu pal mercadín habitual con productos lliterarios, musicales y de moda n’asturianu, y chigre con comida y bébora, cola posibilidá de xintar nel llugar.

El cantar del Día de la Reciella

Nun va faltar el cantar promocional del Día de la Reciella, del qu'esti añu va encargase Nacho Fonseca, que va cantar xunto cola so fía Esther y la so nieta Manuela: "Tenemos ehí tamién a les trés xeneraciones cantando n’asturianu", señaló Guardado. Ésti va proyeutase mañana nel tendayu del Muséu del Pueblu d'Asturies.

Na semeya, María Xosé Rodríguez López, responsable de la Oficina de Normalización Llingüística; Guardado; y López Moro.