“Nun ta habiendo avances significativos nel usu del topónimu ‘Xixón’ esti mandatu”, apunta Tuero

Podemos-EQUO censura que’l Conceyu “nun mirara pol usu del topónimu ‘Xixón’ nel tornéu ATP 250” que se celebró la selmana pasada nel Palaciu de Deportes. La so vocera, Laura Tuero, considera que “nun ta habiendo avances significativos” nel emplegu de la forma asturiana “esti mandatu” y recuerda la poca actividá del Conseyu Asesor.

Entrugada por YeXixón al respeuto de l’ausencia del nome de llugar ‘Xixón’ nel tornéu de tenis del que salió ganador el rusu Andrey Rublev, númberu 9 del mundu, la edil calcó en que “el Plan de Normalización establez qu’ha emplegase en tolos eventos con proyección esterior, como ye esti casu, onde l’Ayuntamientu amás aportó 1,2 millones d’euros de financiación”. Una situación que nun siempre se cumple, sobre manera n’actividaes del Patronatu Deportivu Municipal.

“Nun nos paez que se tea dando un retrocesu nel usu del topónimu asturianu, pero vemos que tampoco ta habiendo avances significativos esti mandatu”, apunta Tuero, qu’añade que “hai espacios del ámbitu municipal onde sigue ausente y otros onde s’incorporó. Por poner un exemplu, esti añu por vez primera’l cartelu oficial de la Semana Negra recoyó’l doble topónimu, que ye, cenciellamente, lo que marca'l Plan de Normalización Llingüística. Y La FeLiX (Feria del Llibru de Xixón) y Danza Xixón usen esclusivamente’l topónimu asturianu. Sicasí, nes marques viales nel pavimentu p’acutar sitios pa vehículos llétricos usáse namás el topónimu castellanu”.

L’órganu qu’ha facer un siguimientu al cumplimientu d’esti documentu aprobáu en Plenu pal periodu 2020-2023, el Conseyu Asesor de la Llingua Asturiana, ta teniendo una actividá menor a la marcada. “Según los sos estatutos ha aconceyar cada tres meses, anque no que va d’esti añu namás axuntó nuna ocasión, en plenu branu, polo que dalgunos de los sos integrantes nin siquiera pudieron tar presentes”, llamenta Tuero.

Tamién ausente nes primaries socialistes

“Dende Podemos-EQUO Xixón tamos vixilantes pa que se respete’l topónimu asturianu, porque vemos un escasu compromisu al respeuto nel PSOE xixonés. Ye significativo, nesti sen, que les dos persones que se presentaron a les primaries socialistes pa l’Alcaldía omitieran de forma sistématica’l topónimu ‘Xixón’ nes sos intervenciones públiques y nes sos redes sociales”, fina.

Na semeya, Tuero na sala de prensa de la Casa Conceyu, onde sí apaez el topónimu oficial, la forma billingüe 'Gijón/Xixón'.