La Universidá Popular recupera’l cursu presencial de Llingua Asturiana

Esti añu les alumnes y alumnos que quieran recibir el cursu de Llingua Asturiana de la Universidá Popular van poder facelo esti trimestre de manera presencial en L’Arena en nivel d’iniciación depués de delles ediciones con namái modalidá en llinia. Ésti caltiénse en nivel mediu.

El presencial, ‘Llingua Asturiana: iniciación’, va ponese los llunes y miércoles de 19 a 21 hores nel Centru Municipal Integráu de L’Arena. Nel mesmu va facese una na introducción al idioma dende'l nivel más básicu, apurriendo conteníos gramaticales, vocabulariu, ortografía, exercicios pa trabayar la oralidá y conteníos culturales complementarios.

El cursu quier sirvir mesmo p'aquelles persones que tienen l'asturianu como llingua familiar y quieran afondar na alfabetización, como pa persones que partiendo de cero quieren averase y garrar les primeres capacidaes comunicatives nel idioma, tanto per escrito como de forma oral. Los sos conteníos son: primeres lleiciones de gramática: alfabetu, artículu, sustantivu, posesivos, numberales, neutru de materia, etc; normes ortográfiques (apóstrofos y contraiciones); historia de la llingua asturiana; variedaes internes del asturianu; usu oral; lliteratura asturiana; llectura de llibru; sociollingüística; y vocaboluriu.

Mentes, el cursu en llinia, ‘Llingua Asturiana: mediu’, va tener llugar los martes y xueves de 20 a 21.30 hores. Nél va facese un afondamientu nos conocimientos de llingua asturiana vistos nel nivel básicu, apurriendo los mesmos conteníos nun nivel más avanzáu.

El cursu quier sirvir pa persones que pasaron yá per un cursu inicial y que busquen ameyorar les sos capacidaes comunicatives n'asturianu, mesmo escrito qu'oral. Nesti casu los conteníos del mesmu inclúin lleiciones de gramática: alverbiu, interxecciones, conxunciones, indefiníos, interrogativos, verbos regulares, etc.; normes ortográfiques: afondamientu nes normes, toponimia, etc; historia de la llingua asturiana; el dominiu llingüísticu; usu oral; lliteratura asturiana; música asturiana y otres espresiones artístiques; llectura de llibru; sociollingüística; y vocabulariu.

Hasta’l día 30

Los dos cursos tienen un llargor de 40 hores y un preciu de 40 euros. Les persones interesaes tienen hasta’l día 30 pa facer la matrícula nes oficines d’atención a la ciudadanía –preferentemente con cita previa–, na aplicación ‘Gijón’ o al traviés de la páxina de la Universidá Popular.

En total, na programación d'esta seronda úfrense 121 cursos, munchos venceyaos a la cultura asturiana, que, como ye vezu, tán teniendo una alta demanda. Tamién s'aumenten el númberu de places a niveles anteriores a la pandemia.