La gaita ye protagonista estos díes en Xixón

Esti miércoles arranca’l XXII Festival Internacional de Bandes de Gaites Villa de Xixón, que convierte a esti instrumentu en protagonista na villa hasta’l domingu, día nel que va tener llugar la gala na Plaza Mayor. Formaciones d’Alba, Éire, Galicia y Catalunya participen nesti certame.

El grupu folk Burbús va abrir a les 20 hores esta edición na plaza de La República con un conciertu nel que va presentar un repertoriu que xunta tradición y creación nueva. Mañana l’actividá va treslladase a la Plaza’l Marqués, onde a la mesma hora va tocar la formación inglesa de tradición escocesa Cambridgeshire Caledonian Pipe Band.

El vienres xixoneses y visitantes van poder disfrutar de la presencia de toles bandes participantes convidaes nesta edición del festival, tamién a les 20 hores, colos irlandeses North Coast Dance Company nel paséu de Begoña, la gallegos Agarimo de Catabois na plaza Italia, los catalanes Sons de la Cossetània nos Xardinos de la Reina, y los escoceses nel Paséu de Begoña.

Folixa Intercéltica

El Muséu del Pueblu d’Asturies va acoyer la esperada Folixa Intercéltica, que torna depués del parón obligáu pola pandemia. Va pasar al sábadu, con entamu al meudía y accesu llibre, y va contar cola animación d’Agarimo de Catabois y Sons de la Cossetània; un taller de baille con Pau Santirso (17 hores); y los conciertos de Seis Riales (20 hores) y del tríu asturandaluz Deira (22 hores).

Esta fiesta va sirvir como preámbulu al gran día del certame, entamu de la Selmana Grande. A les 12 toles bandes, a esceición de la irlandesa, va desfilar nel Día d’Asturies per El Muro xunto cola organizadora Banda de Gaites Villa de Xixón.

La gran gala de la Plaza Mayor ta prevista pa les 21 hores y enantes, a les 20, va haber un pasucais dende los Xardinos de la Reina p’animar al públicu a presenciar l’eventu final d’un festival qu’esti añu recupera la normalidá.

Na semeya, presentación del XXII Festival Internacional de Bandes de Gaites Villa de Xixón na Casa Conceyu.