Amosando vuelve esti 2022 con Baxel y Algaire

Los conciertos van grabase en Les Naves d'El Natahoyo pa difundilos depués n'Internet.

El ciclu Amosando, que sirve de presentación de los trabayos de los grupos del país, celebra la so primer sesión del añu, cuarta edición del mesmu, con dos formaciones debutantes. Son Baxel, el dúu folk formáu por Rigu Suárez y Paul Balmori, que ta acabante d'asoleyar 'El cantar del Simpatías'; y Algaire, cuartetu compuestu poles pandereteres y cantantes Loreto Suárez, Iratxe Espina, Carla Miranda y el guitarrista Juan Yagüe, que se presenten con 'Coral y maera'.

La grabación d'estos conciertos en formatu íntimu va desendolcase'l domingu a les 18 hores con presencia de públicu convidáu sociu de Musicasturiana.com, responsable d'esta iniciativa. Nes selmanes próximes les realizaciones a cargu de Javier Lueje y Rubén Álvarez van tar disponibles n'Internet cumpliendo asina l'oxetivu principal d'Amosando, esto ye, dar a conocer la música asturiana en tol mundu.