Caldo y Os Rabizos, y Toli Morilla piesllen Amosando 2021

El Toma 3 acueye la grabación d'estos conciertos en formatu íntimu.

Esti domingu, a les 17 hores, va tener llugar la última sesión d'esti añu del ciclu Amosando col que Musicasturiana.com presenta les novedaes discográfiques de la escena y les promociona en tol mundu al traviés d’Internet. Los convidaos nesta ocasión son Caldo y Os Rabizos, y Toli Morilla.

La bandina tradicional del occidente del país, qu’interpreta un repertoriu popular procedente de la so fastera, va tocar temes de ‘A Música Tradicional del Eo-Navia’, el so primer trabayu. Ye un llibru-discu con 15 pieces nel qu'esplora l’archivu de tradición musical de les bandines de baille que percorrieron los conceyos que van dende la montaña lucense hasta la zona de los vaqueiros d’alzada, y dende la mar hasta la montaña d’Ibias.

Va tocar tamién nesta sesión, la novena d'Amosando, Toli Morilla, el más veteranu de la xeneración de cantautores posterior al Nuevu Canciu Astur. ‘Canciones transgénicas para el mundo mascota’ ye’l so últimu discu, qu’inclúi dos temes n’asturianu.

La difusión de les actuaciones musicales acompáñase d'entrevistes a los intérpretes. Javier Lueje encárgase de la realización audiovisual d'esti eventu que tien asistencia llendada, con prioridá pa los socios de Musicasturiana.com, anque la xente interesada pue consultar si hai disponibilidá nel corréu electrónicu tiendamusicasturiana@gmail.com.