La ministra firma'l protocolu del Plan de Víes

Establezse asina'l marcu xeneral pal desendolcu de les actuaciones y l'entamu de la redaición de los proyeutos básicu y constructivos necesarios.

Raquel Sánchez Jiménez desplazóse ayeri a Xixón pa firmar el protocolu del Plan de Víes. La ministra de Tresportes, Movilidá y Axenda Urbana robló esti documentu xunto al presidente Adrián Barbón, l'alcaldesa Ana González Rodríguez y la presidenta d'Adif, María Luisa Domínguez, les cuatro partes implicaes.

Esti pasu nuevu llega llueu de l'aprobación de la Declaración d'Impautu Ambiental en xineru y permite avanzar a la redaición del proyeutu de la estación intermodal en Moreda, que va llicitar Adif xunto col de conexón col metrotrén de manera independiente. Asina conoceráse la inversión total pa depués firmar un conveniu nuevu que sustituya al del 2019 y entamar cola so construcción.

La ministra anunció que la llicitación va facese darréu, pero nun pon fecha pal comienzu de los trabayos.

Na semeya, la delegada del Gobiernu estatal n'Asturies; Delia Losa; Sánchez Jiménez; Barbón; y González Rodríguez nel actu celebráu na Casa Conceyu.