El Telecable repite rival na apertura de la OK Lliga de ḥoquei patinos
|
4 Payares, 2021 por Pablo R. Guardado
- Log in to post comments
El Generali HC Palau de Plegamans foi verdugu de les xixoneses na Supercopa (5-2).
El Telecable Solimar Xixón garra otra vegada carretera hasta Catalunya, agora p'abrir la OK Lliga de ḥoquei sobre patinos femenín. El rival va ser el mesmu, actual campeón de la competición, d'Europa y vencedor tamién de la Supercopa'l domingu al superar na final al Cerdanyola CH Feníe Energía por 6-0.
En semifinales superaron a les de Fernando Sierra nun partíu nel que s'adelantaron les catalanes nel minutu 2, anotando'l segundu nel 10. Marta Piquero empató darréu, pero'l 3-1 llegaría al minutu con mala fortuna.
El resultáu al descansu sería de 4-2, con un tantu de penalti de Sara Roces al final del parcial, y na reanudación'l Palau siguió amosando superioridá, que se treslladó nel marcador con un gol más, el definitivu 5-2. Esti sábadu, a les 20 hores, el Telecable va buscar la revancha y empezar con bon pie na competición regular.
Campaña d'abonaes y de socies
El club de La Calzada tien en marcha la campaña d'abonaes y socies de cara a esta temporada. Les persones intereses pueden inscribise per Internet al traviés d'esti enllaz.
El sábadu día 13 el primer rival de les xixoneses nel pabellón de Mata-Xove va ser Las Rozas. El partíu ta programáu pa les 19.15 hores.
Na imaxe, Florenza frente al bancu xixonés. Semeya propiedá de la Federación Española de Patinaxe.
