Un añu ensin versión n'asturianu na web

La llingua asturiana desapaeció del portal municipal llueu de la so renovación.

Iniciativa pol Asturianu va treslladar al aconceyamientu d'esta tarde del Conseyu Asesor de la Llingua de Xixón l'ausencia del asturianu nuna ferramienta comunicacional tan importante como la ye la páxina web, qu'hasta'l cambiu fechu hai un añu sí contaba con versión n'asturianu y n'otros idiomes como l'inglés, el francés, l'alemán y el rusu, asina como la situación del dominiu www.xixon.es, que redireiciona a la versión vieya. “Vamos reclamar una solución pa que la llingua asturiana torne a tener presencia na web del Conceyu de Xixón”, asegura’l presidente Iván Llera, que considera que “nun tien xustificación qu’un añu depués de la presentación del nuevu portal l'asturianu siga ensin tener presencia dala”.

Inclusive afirma que “la Oficina de Normalización lleva meses tornando conteníos que depués nun se suben a la web, quedando munchos d'ellos desactualizaos”. La presencia del asturianu na páxina web municipal ye un mandatu recoyíu nel Plan de Normalización Llingüística pal periodu 2020-2023, en concretu nel puntu 16, aprobáu por mayoría nel Plenu municipal d'agostu, que manda “emplegar l'asturianu nos conteníos institucionales de la nueva páxina web municipal xunto col castellanu, teniendo d’equiparar pasu ente pasu los demás conteníos, asina como los de les empreses municipales”.