L'asturianu tien una "presencia probetaya" na web nueva de Xixón

Iniciativa pol Asturianu considera que la páxina "había dar exemplu nun afitamientu ‘mínimu’ de la presencia y usu del idioma".

Xixón ta acabante d'estrenar la versión nueva de la so web, entovía en desendolcu y con munchos errores. Ente les quexes que ta recibiendo ta'l pesu del asturianu na mesma, que tien "una presencia probetaya" según esplica esti coleutivu que trabaya pola normalización del idioma en toles estayes.

“Ye un claru retrocesu nel avance de polítiques llingüístiques a sabiendes de qu'una páxina web municipal tien abonda visibilidá. Ye una ventana al mundu na que puede tar presente l’asturianu”, asegura Fonsu Martín. "Al traviés d’Internet podemos entrar a les páxines web municipales d’otres ciudaes como Santiago de Compostela, Vigo o La Coruña onde hai presencia digna del idioma propiu. ¿Por qué Xixón tien que ser menos nesi sentíu?", entrúgase'l vocal d'Iniciativa pol Asturianu.

Esta organización, que tuvo trabayando nel Plan de Normalización Llingüística 2020-2023, que se va aprobar nel Plenu ordinariu d'esti mes, diz nun entender "cómo ye posible que se presente una nueva páxina web que nun s’adapta a esi futuru plan". "Llama l'atención por parte de l'alministración municipal esti pasu atrás cuando dende'l Gobiernu del Principáu, tanto'l presidente delles veces, como nel usu audiovisual nes campañes de la COVID-19 ta apostándose por un usu del idioma d'un mou positivu", añade Martín.

Enllaces que dan error

El vocal esplica que p'atopar l'asturianu na web nueva, que "había dar exemplu nun afitamientu ‘mínimu’ de la presencia y usu del idioma", "hai qu'investigar y tolos enllaces dan error". Mentes, el dominiu www.xixon.es nun redirixe a la web nueva, sinón que lo fai a la vieya, tamién en castellanu: "L’asturianu nun sal bien paráu con esti cambéu", sentencia.