El Sporting nun foi quien a dar una allegría a l'afición na so vuelta a El Molinón

L'equipu roxiblancu nun fixo los deberes na xornada última de lliga en Segunda y nun pudo aprovechar el tropiezu del Rayo en Vallecas énte’l Lugo. La vuelta de l’afición a El Molinón –5.000 espectadores– nel partíu col Almería (0-2) nun foi suficiente pa emburriar a un Sporting que llegó mui xustu de fuercies al tramu final.

Yera día d’allegría pa gran parte de la masa social del club roxiblancu. 5.000 siguidores, los más veteranos qu’escoyeron la opción A sacante los 300 del partíu de Copa col Betis, volvíen a El Molinón un añu y dos meses depués d’aquel 4-0 a Las Palmas del 8 de marzu del 2020 que se celebró ensin saber que diba ser l’últimu contautu col Sporting de Djukic y que nun podríen disfrutar del de Gallego hasta ayeri.

A ellos sumáronse munchos aficionaos, sobre manera mozos, que quixeron averase al campu centenariu p’amosar sofitu a los xugadores d’un equipu qu’encaraba la xornada última con opciones de metese nes eliminatories pol ascensu, pa lo que teníen que ganar y esperar que’l Lugo sumara en Vallecas nun partíu nel que se xugaba la permanencia. Los gallegos cumplieron; el Sporting, non.

Dos desafortunaes aiciones de Mariño, otrora salvador, condenaron a un equipu que nun supo crear peligru al Almería. Una ocasión d’Aitor García na primer metá y otra de Djurdjevic na segunda foron los únicos acercamientos con peligru real de los llocales hasta los dos duros disparos d’Aketxe dende fuera del área.

Fuego nun sigue

Gallego llamó a Carmona pa que saliera nel tramu final pa recibir la merecida ovación d’El Molinón por nueve años defendiendo la camiseta. Nun foron los únicos aplausos, yá que depués del pitíu final los presentes reconocieron a los xugadores la campaña desendolcada y tresmitieron el so ciñu a Mariño, magar los errores d’ayeri, coriando’l so nome.

Otra manera, el club comunicó esta tarde que Javi Fuego, que tornó la temporada pasada al club depués de 12 años fuera, causa baxa nel equipu. El polesu, de 37 años y titular esta campaña, despidióse de l’afición con una emotiva carta llueu de nun recibir entá ufierta de renovación.