L'UC Ceares fai historia: campeón de Tercera División y ascensu a la nueva Segunda RFEF

Ciares foi esti domingu una fiesta. L'equipu de fútbol del barriu, que necesitaba empatar pa certificar l'ascensu ensin depender de terceros, superó nel Nuevu Nalón a L'Entregu (0-2), trés puntos qu'amás del saltu de categoría da a los de La Cruz el títulu de campeón de Tercera.

Un gol d'Aitor Cañedo nel minutu 14 al rematar de cabeza un córner punxo en bandexa'l partíu al UC Ceares, que tuvo l'apoyu de 100 aficionaos nel campu. L'Entregu, al que namái-y valía la victoria pa xubir, trató de reaicionar, pero Kike y el bon trabayu del equipu de Pablo Busto fixo que nun pasaran apuros.

Inclusive, na segunda metá, nel minutu 67, un balón en llargu en posición forciada de Zuazua recoyólu Madeira en llinia de fondu p'adientrase nel área y cedelu atrás a Medori, con remate rechazáu por Benito y aprovecháu por Juan Carlos pa enganchala de primeres. Los llocales nun pudieron llevantase del segundu golpe y namái quedaba esperar al pasu de los minutos pa la celebración de xugadores, cuerpu téunicu, direutiva y aficionaos desplazaos a la cuenca d'El Nalón nel centru del campu.

El trunfu da al Ciares el títulu de campeón nel añu nel que cumple 75 d'historia, amás del ascensu a la Segunda RFEF y una plaza pa la edición próxima de la Copa. Encuadráu nun grupu con gallegos y cántabros, ente los rivales que van visitar La Cruz la campaña próxima va haber equipos como la SD Compostela –en realidá el Campus Stellae coles marques del desapaecíu club que compitiera nos 90 en Primera, que tamién xuega en San Lázaro– y el Laredo, a los que se podría xunir un históricu como'l Pontevedra, amás de los recién ascendíos Arenteiros y Cayón, y de los trés asturianos confirmaos na categoría, l'UP Langreo, el Marino y el Llanera, ésti últimu como segundu clasificáu de Tercera.

Na semeya, el ciarista Medori saca un centru.