La Playa San Llorienzo y xente de Cimavilla protagonicen el videoclip de 'Rambalín'

Rodrigo Cuevas ye l'autor d'esti cantar dedicáu al popular vecín del barriu altu Rambal, una habanera que llevó en Navia'l XII Premiu Camaretá al Meyor Cantar.

Esti videoclip ye parte de la recompensa del gallardón qu'entama la Conseyería de Cultura, Política Llingüística y Turismu que premia al tema más destacáu n'asturianu y gallego-asturiano, nesta edición correspondiente al añu 2019 y la metá del 2020.. La Sociedá Pública de Xestión y Promoción Turística y Cultural del Principáu d’Asturies promovió la realización de la pieza, que recayó n'El Cohete Internacional.

Marta Lallana encargóse de la so direición, enfocando'l trabayu de manera asemeyada a un documental nel que ye protagonista la mar y La Playa San Llorienzo xunto con personaxes reales que viven en Cimavilla. Según esplica, la so intención foi crear un audiovisual "que lloñe de sobresplicar lo que yá cunta la lletra, apurriere una dimensión ente la realidá y la poética, recurriendo a l’alcordanza de l’ausencia de Rambal y a la so tan inspiradora llibertá”.

Amás “quería xugar cola idea de que’l cantar fore como una especie d’himnu qu’habita nos vecinos de Cimavilla, retratando la so ausencia al traviés d’alcontralu presente nos sitios que percorría”. Cuevas nun apaez nel videoclip, que fina con un testu del cantante que diz “a toles persones que, cuando tas avezáu a vivir ente’l despreciu y la vergoña, te miren con tresparencia, t’acompañen con respetu, y te faen decatate de que la vida puede ser maraviyosa. A los playos y playes qu’asina lo ficieron. Gracies”.

En 'Rambalín' l'artista uvieín recupera, a ritmu d'habanera, la memoria d’Alberto Alonso Blanco ‘Rambal’, habitante de Cimavilla bien conocíu en Xixón nes décades últimes del Franquismu qu’amosó la so homosexualidá de forma abierta y que foi víctima d’un asesinatu que quedó impune.

Calca equí pa ver el videoclip.