#XixónQuedaEnCasa: una iniciativa web con propuestes pa ocupar el tiempu nesti tiempu de zarru en llar

Les y los xixoneses tán cumpliendo estos díes coles midíes preventives pa controlar l’espardimientu del coronavirus SARS-CoV-2. Pa facer más llevadero esta situación a los ciudadanos el Conceyu de Xixón pon en marcha la web #XixónQuedaEnCasa, con versión namái en castellanu, con propuestes pa ocupar el tiempu nesti tiempu de zarru mientres l'estáu d'alarma.

L’Ayuntamientu va xubir ehí conteníos, como videos protagonizaos por persones de sonadía, y introducir los propuestos polos propios vecinos de Xixón al traviés del corréu electrónicu propuestas@gijonsequedaencasa.es o del WhatsApp del númberu de teléfonu 648.400.687. Asina, por exemplu, güei actualizóse con un videu de Rodrigo Cuevas interpretando’l cantar dedicáu a Rambal qu’incorpora nel so discu últimu, ‘Manuel de cortejo’.

Tamién incorpora delles estayes específiques, como ‘Actividá física y salú’, ‘Cine y documentales’, ‘Música, teatru y danza’, ‘Museos y teatru’, ‘Llectura’, ‘Recursos formativos de baldre’, ‘Redescubre virtualmente Xixón’ y ‘Actividaes pa neños y neñes’. Una bayura de posibilidaes pa matar l’aburrimientu mientres quedamos en llar pa superar esta situación.