La web #XixónQuedaEnCasa fina l’actividá d'estos dos meses con 75.000 visites rexistraes

La entrada d’Asturies na fase 1 de la desescalada llevó al Conceyu a dar por finada la web #XixónQuedaEnCasa, que dende l’entamu del estáu d’alarma vien ufriendo conteníos diarios pa facer más llevadera la situación a la ciudadanía. Nesti tiempu rexistró 75.000 visites, siendo los mozos de 25 a 34 años los usuarios más numberosos.

La web, qu’empezó’l 17 de marzu con versión namái en castellanu, contó tamién con una propia n’asturianu gracies a la Oficina de Normalización Llingüística. El futbolista del Sporting Carmona, Rodrigo Cuevas, Jerónimo Granda, Inaciu Galán, Igor Paskual, Manu Molina, Alberto Rodríguez, Félix Corcuera, Maite Centol, Fee Reega, Antía Eseuve, Carmona, Tommy Robredo, Alex Corretja, Pablo Carreño, Guillermo Momonje o los integrantes de Pauline en la Playa, Elle Belga o Muñeco Vudú so dalgunos de los 58 deportistes y persones del mundu de la cultura que pasaron pes #XixónQuedaEnCasa nesti tiempu.

Amás la páxina web incorporó recetes de 46 profesionales en ‘Xixón a la carta’, 250 propuestes de vecinos, decenes de semeyes y videos de les neñes y neños del conceyu nel espaciu infantil con actividaes especiales pa la reciella, y estayes pa facer actividá física o disfrutar de los museos municipales, ente otros conteníos. Los mozos de 25 a 34 foron los que más siguieron esta iniciativa (33,5 por cientu), que rexistró 75.000 visites, dalgunes d’elles procedentes d’Estaos Xuníos, Alemaña, Reinu Xuníu, Bélxica, Arxentina, Francia, Canadá y Suiza.

La web, magar que nun s’actualice dende ayeri, va siguir abierta pa la ciudadanía, que podrá consultar tolos conteníos d’ociu, entretenimientu, formación y divulgación asoleyaos nestos cuasi dos meses.