El Círculo llibera a los sos xugadores a la espera de la decisión final de la FEB

Los clubes soliciten dar por finada la temporada énte la situación pol coronavirus.

Tolos xugadores del Círculo tán yá nel so llar nos sos respeutivos llugares d'orixe. L'equipu de baloncestu de LEB Plata decidió rescindir la selmana pasada'l contratu de los sos deportistes n'alcuerdu con ellos en previsión de les midíes pa frenar l'espardimientu de la pandemia de COVID-19, que s'instauraron el sábadu, y espera la resolución de la Federación Española de Baloncesto (FEB) al respeuto, que namái anuló los partíos de marzu.

Diecinueve de los venticuatro clubes de la categoría, ente ellos l'equipu xixonés, roblaron un comunicáu solicitando'l fin de la competición dada la situación y les perspeutives de qu'ésta s'allargue más tiempu, coles consecuencies económiques que tendría pa estes entidaes. La FEB tomará la decisión estos díes, mentes que l'ACB, independiente, decidió aplazar los partíos hasta'l 24 d'abril.

De confirmase la suspensión de la temporada, quedaría por conocer tamién qué pasaría colos ascensos y descensos. Nel casu del club xixonés, ta lluchando pola permanencia, nuna situación complicada anguaños tres comenzar la segunda fase de la Lliga con trés derrotes siguíes, lo que lu sitúa a trés de la salvación, que marca Morón, a falta de nueve xornaes.

Semeya propiedá del Círculo Gijón Baloncesto y Conocimiento. Autor: Carlos Garna Fotografía.