El gobiernu algama l’apoyu de Podemos-EQUO p’aprobar les ordenances fiscales y tases pal 2020

L’apoyu de Podemos-EQUO permitió al gobiernu del PSOE y Xixón pela Izquierda sacar alantre les ordenances fiscales y les tases y precios públicos del 2020, ente ellos 'l'IBI pa ricos'. La negociación de los presupuestos va ser el retu siguiente de equipu d’Ana González, pa lo que volverán a buscar el sofitu de la formación morada.

“Creemos que son unes bones, ameyorables, pero bones ordenances fiscales que son frutu d’una bona disposición del equipu de gobiernu, pero tamién resultáu d’una aición política que punxo eriba de la mesa coses que siempre se nos dixera que nun se podíen facer y resulta que sí se pue”, aseguró nel Plenu Yolanda Huergo, vocera de Podemos-EQUO, que reclamó’l valor de “facer más polítiques pa la xente”. Siempre que se vaya nesi camín, l’alcuerdu pa los presupuestos municipales sería una realidá, dexó cayer a la salida de la sesión.

Ente les midíes aprobaes nel Plenu ta la creación d’un IBI diferenciáu, con un tipu del 0,79 por cientu, a propiedaes con un valor catastral superior al millón d’euros destinaes a usos empresariales. Tamién aumentóse’l preciu del agua, la basura o los equipamientos deportivos, ente otros, y baxóse’l del billete d’autobús pagáu col abonu, que queda en 0,70 euros.

Toes estes modificaciones provocarán un aumentu de los ingresos pal Conceyu de 3 millones d’euros.