Álvaro Muñiz ye l'escoyíu por Foro pa caltener l'alcaldía

El II Congresu de Foro Xixón escoyó a Álvaro Muñiz como candidatu de Foro a l'alcaldía de Xixón. La formación que gobierna'l conceyu dende hai 8 años afronta'l retu de la salida de Carmen Moriyón tres cumplir l'alcaldesa les dos llexislatures que marquen los estatutos.

El direutor del Recintu Ferial Luis Adaro superó na carrera pa convertise en presidente de Foro Xixón a Esteban Aparicio, conceyal de Seguridá Ciudadana, Movilidá y Tresportes, por 255 votos a 81, rexistrándose 5 en blancu. Por porcentaxes, Muñiz algamó un 74,28 por cientu del total de votos, por un 23,48 por cientu del so rival.

"Esta candidatura presenta güei –pol sábadu– un proyeutu d'equipu, l'equipu Foro Xixón, y si dalgo fai un equipu ye nun dexar a naide atrás”, destacó'l que va ser el cabeza de llista nes municipales del 26 de mayu depués de conocese'l resultáu de la votación. "La política con mayúscules debe favorecer la creación de entornos estables y regles nidies, onde les aiciones sociales y empresariales alcuentren un campu fértil nel que prosperar, dando protagonismu al individuu, ensin llendes tributaries desmidíes, escesives regulaciones y ensin dependencia de subsidios", defendió, pa depués señalar que "el Xixón nel que creemos ye un Xixón solidariu, qu'ayuda a les sos persones con más dificultaes, faciendo valir la máxima qu'una sociedá próspera defínela la situación del so esllabón más débil; si nos va bien, tien que dinos bien a toos".

Semeya propiedá de Foro.