Una Selmana Santa estrada de propuestes

Presentada la ufierta cultural, deportiva, gastronómica y d’espardimientu de Xixón ente’l 7 y el 16 d’abril.

El conceyal de Turismu, Deportes, Festexos y Xuventú, Jesús Martínez Salvador, presentó esti xueves 6 na Casa Conceyu de Xixón el programa d’actividaes que van poder esfrutar xixoneses y visitantes nel periodu vacacional viniente de Selmana Santa.

Procesiones de Selmana Santa

Les procesiones y actos relixosos propios de Selmana Santa van tener llugar tolos díes dende’l Sábadu de Pasión, 8 d’abril, hasta el Llunes de Pascua, 17 d’abril. Ente toles procesiones destaquen la Solemne Procesión del Alcuentru Camín del Calvariu, que se celebra’l Miércoles Santu y que tien el so puntu d’alcuentru na Plaza’l Marqués, y la Solemne Procesión de la Resurreición, alcuentru que tien llugar na mañana del Domingu de Resurreición y que termina en Campu Valdés.

Xardín Botánicu Atlánticu, Bus Turísticu, Ruta de la Sidra, Xixón Llambión y Xixón  Card

Dende’l 11 hasta el 16 d’abril, el Xardín Botánicu Atlánticu entama visites guiaes xenerales y temátiques de baldre (incluyíes col preciu de la entrada) n’horariu de mañana y tarde. Amás, a estes visites súmense dos sesiones de cuentacuentos na mañana del xueves y vienres, 13 y 14 d’abril, y un taller infantil “Güevinos de Pascua”, que va desendolcase’l sábadu y domingu, 15 y 16 d’abril, ente les 12h y les 14h.

Arriendes d’ello, ente’l 13 y el 16 d’abril va ponese en marcha’l Bus Turísticu pa descubrir Xixón del mou más cenciellu. Esti autobús percuerre los puntos turísticos principales de la ciudá y tien la so salida na parada l’espigón de Fomentu (Puertu Deportivu).

Tamién esos díes, Infoxixón va ufiertar descuentos especiales nos productos turísticos de Xixón: Ruta de la Sidra Xixón, Xixón Llambión y Xixón Card. Tolos productos puen mercase nes Oficines de Turismu y na tienda online de la web de Xixón Turismu. Los descuentos son del 50% na Xixón Card, del 30% nos bonos de Xixón Llambión y ente’l 10 y el 20% nos bonos de la Ruta de la Sidra.

Espectáculos

Estos díes tamién vamos poder esfrutar d’una ufierta cultural amplia bayurosa na ciudá. El 8 d’abril el Teatru Xovellanos va acoyer “En el desierto”, espectáculu de danza de la compaña Losdedae qu’algamó’l premiu MAX al meyor espectáculu de danza en 2016. Esta obra ta protagonizada por Ernesto Alterio y dirixida por Chevi Muraday. Esi día mesmu, nel teatru de Llaboral Ciudá de la Cultura, los amantes de la música portuguesa tienen una cita con Teresa Salgueiro. La voz almirada ya inconfundible de Madredeus va presentar el so álbum caberu “O horizonte”.

Tamién en Llaboral Ciudá de la Cultura va desendolcase’l festival de maxa “Piccola Laboral”. Esti festival, qu’inclúi talleres y una gran gala infantil, va celebrase’l 16 d’abril. Ya’l Paseu de Begoña, el 12 d’abril a les 18h, va acoyer un conciertu de baldre de Coro Iroise, una coral qu’aporta de Bretaña (Francia).

Juguetea Family Festival y Acuariu de Xixón

Del 13 al 16 d’abril, el Recintu Ferial Luis Adaro de Xixón va convertise nun parque d’atraiciones y espectáculos pa neños y neñes con actuaciones musicales, circu, maxa, teatru, talleres, zona de xuegos, mercáu, 'food trucks' y una amuesa que tresportará a los visitantes a los momentos meyores de la so infancia: “Espinete nun esiste”, con xuguetes y pieces dende los años 50 hasta los 90.

L’Acuariu tamién programó delles actividaes pa estes vacaciones: del 7 d’abril hasta’l 6 de mayu va afayase la esposición “Flipeces”, una esposición de collages de Paco Abril, que tamién va incluyir talleres infantiles; del 10 al 12 d’abril, un Campamentu Polar pa neños y neñes de 6 a 12 años; ya’l 14 y 15 d’abril, cenes sol mar, pa esfrutar d’un menú de lluxu en compaña de tiburones, rayas y tortugues xigantes.

Gastronomía y mercaos

Como nun podía ser d’otru mou, la gastronomía tamién ye protagonista en Xixón na Selmana Santa. Estos díes afítense dos festivales: la Gran Mariscada y la VIII Primer Sidre l’Añu. El primeru, del 12 al 16 d’abril, ye una folixa onde atopar mariscos de calidá a precios populares y celébrase nel Recintu Ferial. La Primer Sidre l’Añu va tener llugar del 13 al 16 d’abril nel Muséu del Pueblu d’Asturies, onde se va poder prebar la sidra de 70 llagares, en compaña de música, bandes de gaites y deportes tradicionales.

A los que-yos preste llevase un bon recuerdu tienen dos cites obligaes, el Mercáu Ecolóxicu y Artesanu na Plaza Mayor ya’l Mercáu Medieval nel Paseu de Begoña. Dambos celébrense del 13 al 16 d’abril.

Museos, visites guiaes y esposiciones

Los museos de la ciudá tamién afiten una programación especial pa Selmana Santa. El Muséu del Pueblu d’Asturies, arriendes de la visita guiada de baldre de tolos domingos, ufre una visita a los sos almacenes y a les sos instalaciones nueves; el Muséu del Ferrocarril entama la xornada’l vapor el día 15 d’abril; ya’l Muséu Nicanor Piñole entama, esi día mesmu, un percorríu en xunto col Muséu Evaristo Valle pa conocer la obra de dambos artistes xixoneses.

A les visites a los museos axúntense visites guiaes pela historia y asocedíos de Cimavilla, Un percorríu pel Xixón romanu o Un paseu con Xovellanos. Estes visites van desendolcase ente’l 13 y el 16 d’abril. Amás, el Parque Arqueolóxicu Natural de la Campa Torres va entamar un taller de cocina en familia pa deprender a cocinar a la romana el 11 y 12 d’abril.

Deporte y 30 díes en bici

Del vienres, 7 d’abril, hasta’l domingu, 16 d’abril, 30 díes en bici entama actividaes diaries pa los amantes de la bicicleta. Hai talleres, torneos, charres… Tamién habrá salíes pa bicicletas de carretera y salida nocherniega en BTT. Los vienres, 7 y 14 d’abril, va organizase un bicitapeu y, pa los turistes, del xueves 13 al domingu 16 entámase un Bicitour Turísticu que percorrerá los espacios más emblemáticos de la ciudá.

En cuantes a les actividaes deportives, destaquen el 3º Women’s Flag Bowl, el 8 y 9 d’abril en Les Mestes, y el 10º Duatlón de Xixón, que va celebrase’l 14 d’abril pela redolada la Playa de Poniente.