Aporta la Primer Sidre l'Añu

Esti eventu va tener llugar del 13 al 16 d'abril nel Muséu del Pueblu d'Asturies de Xixón.

Esta mañana presentóse en Xixón la octava edición del 'Primer Sidre L'Añu'. Trátase yá d'una cita afitada nel calendariu xixonés como demuestra la so declaración por parte de la corporación del conceyu de Xixón como eventu d'Arraigu Social. L'actu contó cola presencia de Teresa Sánchez, direutora del Teatru Xovellanos en representación de Divertia; Carme Pérez de la Fundación Asturies XXI, entidá organizadora del eventu; y Falo Nosti, responsable de los talleres que se van desarrollar a lo llargo d'esta edición. Tamién tuvo presente Rafael Fernández, del Llagar Buznego, sidra oficial del certame al ganar el concursu Meyor Primer Sidre L’Añu.

Cola Primer Sidre L'Añu, la Fundación Asturies XXI quier recuperar la tradición de les espiches de Selmana Santa y el consumu de la sidre nuevo, esto ye, ensin trasegar. Esti tipu de sidra taba perdiendose pol procesu d'industrialización, pero gracies a iniciatives como ésta ta entamando a garrar puxu otra vegada. La edición del Primer Sidre L'Añu faese nel entamu de la temporada sidrera asturiana, siendo yá un alcuentru de referencia onde s'axunta cultura, ociu, tradición y gastronomía. Nesta edición va realizase un homenaxe a Constantino Ovín de la Vega (Tino'l de La Barraca) recientemente fináu y autor del 'Decálogu del escanciador'.

Amás de la sidra, hai programaes actividaes pa toles edaes, con actividaes culturales, llúdiques y gastronómiques: exhibiciones, talleres, tasties guiaes, cocina en vivu, música y baille'l país, deportes tradicionales y amuesa d'artesanía en vivu. Pa los neños y neñes hai programao un ampliu abanicu d'actividaes alrodiu de la nuesa bébora tradicional. Al ser un eventu pa tolos públicos va haber sidre'l duernu y ensin alcohol, ya qu'ún de los principales oxetivos de la Fundación Asturies XXI ye qu'esti eventu seya familiar y que los asistentes puedan disfrutar d'una espicha de prau.

El preciu de la entrada va ser de 5 euros, como n'años anteriores. Por esta entrada van poder tastiase la sidra de los 70 llagares que van tar presentes nesta edición. Como novedá, como xestu de la organización a los '30 díes en bici' que se ta celebrando esti mes na nuesa ciudá, tolos qu'aporten en bicicleta al recintu de la espicha'l domingu 16 van tener la entrada de baldre.