Xulio Ramos va tener una plaza en La Calzada

El cantautor, una voz imprescindible del Nuevu Canciu Astur, finó n'agostu a los 74 años.

Cuasi 1.300 firmes de ciudadanos, entidaes y empreses solicitaron al Conceyu n'avientu la concesión a Xulio Ramos d'un espaciu nel barriu de La Calzada, onde pasó la so vida magar nacer n'Uviéu. Ente elles nomes ilustres de la canción como los de Carlos Rubiera, Víctor Manuel o Chus Pedro, y de la cultura xixonesa.

El miércoles l'alcaldesa Carmen Moriyón confirmólo a los promotores del pidimientu y Xulio Ramos va dar nome a la plaza esistente ente les cais Bolivia, Colombia y Costa Rica. Ésta asítiase na ecofinca que se ta creando en La Calzada.

Integrante de grupos de música pop na so mocedá como Los Ángeles o Los Juniors, ye en Madrid onde tien el so primer ésitu musical. Na segunda década de los 70 torna a Asturies y nunos pocos años pasa a convertise nún de los referentes del Nuevu Canciu Astur, el movimientu qu'engloba a un piñu de cantantes como Carlos Rubiera o'l dúu Nuberu que componen n'asturianu, dando modernidá y presencia al idioma nunos años de gran movimientu cultural.

Ente les sos creaciones rescampla 'Esparabanes', discu asoleyáu nel 1980 pola Sociedad Fonográfica Asturiana, una obra diferente cercana al rock que marcó un enantes y un depués na música asturiana.