XsP pide al equipu de gobiernu un compromisu p'adaptar los nomes de les instalaciones a la toponimia oficial

Foro da'l preste a cambiar el nome del Pabellón de Deportes 'La Tejerona', que sirve a los barrios de Ciares, El Coto y Viesques, pol so topónimu tradicional y oficial, La Teyerona.

Xixón Sí Puede (XsP) pidió na Comisión de Participación Ciudadana, Deportes, Igualdá, Mocedá y Festeyos que les instalaciones y equipamientos del conceyu respeten na so denominación la toponimia oficial, recoyida nel decretu 105/2019 del 20 de setiembre publicáu nel BOPA del 3 d'ochobre del 2016.

L'incumplimientu d'esta normativa espéyase en denominaciones actuales como'l rótulu qu'hai nel Pabellón de Deportes 'La Tejerona', mentes el nome oficial ye 'La Teyerona'. Nesti casu concretu, XsP demandó que s'adapte'l nome a la toponimia aprobada, cuestión a la que se comprometió l'equipu de gobiernu.

Al empar, XsP manifestó la necesidá de qu'esti cambiu se faiga en toles instalaciones del conceyu pa cumplir asina tanto'l decretu pol que s'establez la toponimia oficial de Xixón, como'l Plan de Normalización Social de la Llingua Asturiana. “Los documentos aprobaos y consensuaos nes instituciones del conceyu nun pueden quedar en papel moyáu. La toponimia ye una parte fundamental de la cultura al traviés de la que se tresmite parte de la nuesa hestoria y conservar esti patrimoniu inmaterial ye una simple cuestión de voluntá y respetu pola cultura propia. Ye hora de aplicar y llevar a la realidá lo que yá ta nel papel”, señala Verónica Rodríguez, conceyala responsable de Movilidá y Participación de XsP.