XsP, IX y C's presenten nel Plenu una propuesta de sofitu a la Plataforma de Víctimes del Alvia

La iniciativa que llega a Xixón yá foi aprobada en dellos  conceyos españoles.

Xixón Sí Puede (XsP), Izquierda Xunida (IX) y Ciudadanos (C's) presenten nel Plenu d'avientu una propuesta de sofitu a la Plataforma de Víctimes del Alvia 04155. El colectivu vien lluchando por esclariar les circunstancies nes que se produció'l desgraciáu accidente del tren Alvia 04155 con destín a Santiago de Compostela el 24 de xunetu de 2013 nel que morrieron 81 persones, pa lo que piden a los conceyos el so sofitu espreso y la solicitú al Gobiernu estatal de qu'encargue una comisión d'espertos y técnicos independientes qu'investiguen lo asocedío.

La iniciativa que llega a Xixón yá foi aprobada en distintos conceyos d'España, que se sumen al pidimientu de que l'Executivu abra una comisión d'investigación en sede parlamentaria pa establecer les posibles responsabilidaes polítiques. Al empar, demándase que'l Conceyu reciba a la Plataforma pa conocer les sos demandes y reivindicaciones.

La Plataforma creose col oxetivu “de reivindicar la verdá y la xusticia, esixendo tamién responsabilidaes polítiques polos fechos qu'arrodiaron l'accidente”, tal como s'indica na propuesta impulsada por esti colectivu.

La Plataforma de Víctimes del Alvia 04155, tal como indica nel testu unviáu a los grupos municipales, “denunció en repitíes ocasiones la falta de sensibilidá de les autoridaes y una incomprensible situación de desamparu que viola los sos derechos más básicos como víctimes y familiares”. Nesti sentíu, el colectivu recuerda que “un fechu tan grave nun puede nin tien de quedar nel olvidu de les instituciones públiques y los responsables políticos, y pollo ye necesariu esquizar nes causes y responsabilidaes penales y polítiques que pudieren derivase de dichu accidente ferroviariu”.