Xixón vibra coles campeones del Telecable

Cuatro de cuatro: Supercopa, WSE Champions League, Copa y, esta fin de selmana, la Lliga. El Telecable fixo historia al derrotar tamién el vienres nel segundu partíu de la final lliguera al Generali Palau de Plegamans y celebró’l títulu faciendo’l domingu un percorríu per Xixón nun autobús descapotable y fiesta final na Plaza Mayor.

El Club Patín Gijón Solimar fixo la meyor temporada de la historia del ḥoquei patinos femenín estatal. Llevó los cuatro títulos en xuegu, lo que-y permitir acumular 16 trofeos: 6 copes d’Europa, 4 lligues, 5 copes y 1 Supercopa.

Les de Ramón Peralta, téunicu uvieín que vive la so primer temporada nel Telecable depués d’una amplia trayeutoria en Catalunya, llegaben al choque del vienres depués de ganar la selmana anterior nun Mata-Xove hasta la bandera por 2-1. Teníen entós dos oportunidaes en Palau-solità i Plegamans pa llevantar la copa, pero nun quixeron llegar a un tercet partíu y al descansu yá llegaben con un 0-2 gracies a un gol tempraneru de Piquero y otru cerca del final de Roces, marcador que les llocales nun podríen igualar na segunda metá magar un gol de Blackman nel minutu 37 que-yos daba esperences (1-2).

Folixa y percorríu en bus per Xixón

La fiesta en La Calzada y en tola villa nun se fixo esperar, depués d’un llargu viaxe dende Catalunya que nun quitó les ganes de celebrar a xugadores, cuerpu téunicu, direutiva y aficionaos desplazaos. Ayeri percorrieron nun autocar de dos pisos descapotable dellos barrios recibiendo’l ciñu de los xixoneses, con fiesta final na Plaza Mayor.

La ruta arrancó a les 19 hores de La Calzada, en concreto del llugar onde’l Telecable xuega los sos partíos como llocal, el pabellón de Mata-Xove, pa tomar direición Xixón y xirar en Príncipe de Asturias hasta El Llano. Llueu tomaría direición a Ciares pa baxar a Begoña y siguir hasta'l balcón de la Casa Conceyu, un percorríu nel que munchos ciudadanos dieron el so aplausu a les campeones.