Xixón va glayar pola oficialidá'l 6 d'abril

La Xunta pola Defensa de la Llingua Asturiana (XDLA) escoyó Xixón pa celebrar una manifestación pola oficialidá del asturianu y del gallego-asturiano cola que tratar de repetir l'ésitu de la entamada l'añu pasáu n'Uviéu. Va tener llugar el sábadu 6 d'abril baxo'l mesmu lema: ‘L’asturianu llingua oficial ¡agora!’.

La cercanía de les eleiciones Europees, Nacionales y municipales del 26 de mayu –a les que se sumen tamién agora les Estatales el 28 d'abril– lleva a la organización a convocar esta marcha que va salir a les 18 hores de L'Humedal. La oposición a la cooficialidá, con argumentos que falen d'imposición y un gastu eleváu, ye una de les banderes que vien ximelgando'l PP nesti tiempu y la XDLA quier liderar una demostración nueva de fuercia de la sociedá civil a favor de la equiparación de derechos de los falantes d'asturianu y gallego-asturiano colos de castellanu n'Asturies.

Con cerca de 30.000 participantes el 21-A pasáu peles cais d'Uviéu, la reivindicación llingüística torna a Xixón, onde'l 22 de xunu del 1976 tuvo llugar la histórica manifestación ‘Autonomía rexonal. Bable nes escueles’ convocada por Conceyu Bable, y plaza qu'acoyó nel pasáu una marcha pol Día de les Lletres Asturianes. Como novedá, la XDLA va acompañar esta cita con una serie d'actividaes culturales, recreatives, musicales, gastronómiques y deportives nes selmanes previes entamaes por coletivos y entidaes de tol país, frutu del caltenimientu de numberosos contautos nos meses últimos, que van servir pa da-y difusión al 6-A.