Xixón va contar con una segunda prórroga presupuestaria

Foro nun llevó a Plenu’l proyeutu de presupuestos pal 2019, polo que Xixón va vivir una segunda prórroga presupuestaria. PSOE, Izquierda Xunida (IX) y Ciudadanos votaron en contra na Comisión de Facienda, mentes que Xixón Sí Puede y PP astuviéronse.

Les diferencies de postures y la cercanía coles eleiciones –van celebrase’l 26 de mayu– provoca esta situación. Foro argumenta que nun atopó disposición a negociar na oposición, mentes que’l restu de grupos sorprendiéronse cola decisión de nun llevalo a Plenu, de lo que, aseguraron, s’enteraron al traviés d’un corréu posterior de l’anuncia a la presa, y criticaron la postura del equipu de gobiernu municipal.

Ana Braña, conceyala de Facienda, Organización Municipal y Emplegu, defendió’l presupuestu al “ser el meyor posible” teniendo en cuenta la Llei d’Estabilidá Presupuestaria. Sicasí, reconoció culpa pol incumplimientu de la regla de gastu.